ក្លិប Tottenham Hostpur ប្រកាសកាត់ប្រាក់ខែបុគ្គលិក ២០ភាគរយ

    ក្លិប Tottenham Hostpur បានប្រកាស​ពី​ការ​កាត់​ប្រាក់​ខែ​បុគ្គលិក ​ លើកលែង​តែ​កីឡាករ​ចំនួន២០ភាគរយ ស្រប​ពេល​មាន​វិបត្តិ​វីរុសកូរ៉ូណា។ នេះ​បើ​តាម​សារ​របស់​ប្រធាន​ក្លិប​ លោក Daniel Levy។ ចំពោះចំនួនបុគ្គលិក ដែលត្រូវកាត់ប្រាក់ខែគឺមានប្រមាណ៥៥០នាក់។


    ក្នុង​សារ​របស់លោក Daniel Levy ជនជាតិអង់គ្លេស វ័យ៥៨ឆ្នាំ បាន​រៀបរាប់​ពី​ផលប៉ះពាល់​ដោយសារ​​វីរុស​រាតត្បាត​សកល​មួយ​នេះ ហើយថាការអនុវត្តន៍ការកាត់ប្រាក់ឈ្នួលបុគ្គលិកក្លិបគឺដើម្បីការពារការងាររបស់ពួកគេ។ ក្លិបក៏នឹងគ្រោងប្រើប្រាស់គ្រោងការណ៍របស់រដ្ឋាភិបាលនៅពេលណាដែលសមរម្យផងដែរ។ ចំពោះការកាត់ប្រាក់ខែនេះធ្វើឡើង២ខែគឺនៅខែមេសា និង ខែឧសភា។

    ក្រៅពីនេះ Spurs ក៏​សង្ឃឹម​ថា Premier League និង​ស្ថាប័ន​ដទៃ​ទៀត​លើក​ទឹកចិត្ត​ឲ្យ​កីឡាករ​កាត់​ប្រាក់ខែ​របស់​ខ្លួន ដើម្បី​ទ្រទ្រង់​ប្រព័ន្ធ​បាល់ទាត់។


    សូមបញ្ជាក់ថា បច្ចុប្បន្នក្លិបបាល់ទាត់ធំៗជាច្រើននៅអឺរ៉ុបដូចជា Barcelona, Bayern Munich, Juventus និង Tottenham Hostpur នេះ បានអនុវត្តន៍ការកាត់ប្រាក់ឈ្នួលបុគ្គលិក ដោយសារវីរុសកូរ៉ូណាបានបង្អាក់មិនអោយមានការប្រកួតកើតឡើង ដែលនាំអោយប៉ះពាល់ដល់ចំណូលរបស់ក្លិបបាល់ទាត់ទាំងអស់៕


អត្ថបទដោយ៖ កុមារទេព

Loading...