ចៅក្រម៣រូប ត្រូវជាប់ពិន័យ ក្រោយកាត់ក្ដីឲ្យ បូរ៉ា ចាញ់ទួនប៉េ

    ក្រោយ​ពី​ផ្ទុះ​រឿង​រ៉ាវ​មិនប្រក្រតី​ស្តី​ពីការ​សម្រេច​លទ្ធផល​អោយ​កីឡាករ​គុនខ្មែរ​ ឃីម បូរ៉ា ចាញ់​ពិន្ទុកីឡាករ​ថៃ​ ទួនប៉េ ស៊ីតសាមផាយ៉ាក់ ​ទាំង​មិន​ទំនង ឯ.ឧ តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានធ្វើកោះប្រជុំជាបន្ទាន់ ដើម្បីពិនិត្យវីដេអូនៃការប្រកួតរវាងកីឡាករ​ទាំង​ពីរ​រូប​និង​ធ្វើ​ការ​វិនិច្ឆ័យឡើង​វិញ​នា​សាល​ប្រជុំ​របស់​ស្ថានីយ៍ទូរទស្សន៍​ CBS កាល​ពី​ល្ងាច​ថ្ងៃ​អាទិត្យ​ទី​១៧​នេះ។


    ក្រៅ​ពី​ឯក​ឧត្តម​ប្រធាន​សហព័ន្ធ​កីឡាប្រដាល់​គុនខ្មែរ តែម ម៉ឺន គេ​ក៏​ឃើញ​មាន​ការ​ចូល​រួម​ពី​ក្រុម​ប្រឹក្សាបច្ចេកទេស និង វិន័យ ដែល​មាន​លោក​សាស្ត្រាចារ្យ ឆឹង យ៉ៅយ៉េន លោក មាស​ សុខគ្រី លោក  អ៊ិន ខេមរិន្ទ លោក រ័ត្ន សេត្ថា លោក និន​ វណ្ណដា លោក ហួត សេងទ្រី និង លោក ម៉ា ស៊ីថេត ដែល​ជា​ប្រធាន​រៀប​ចំ​ការ​ប្រកួត​កីឡាប្រដាល់​របស់ CBS ផងដែរ។ ការ​សើរើ​និង​វិនិច្ឆ័យ​ឡើង​វិញ​នេះ​គឺ​ជា​ការ​ឆ្លើយ​តប​និង​រក​អោយ​ឃើញ​ធាតុ​ពិត​អំពី​លទ្ធ​ផល​នៃ​ការ​ប្រកួត​រវាង​ កីឡាករ​គុនខ្មែរ​ ឃីម បូរ៉ា និងកីឡាករ​ថៃ​ ទួនប៉េ។ សូម​បញ្ជាក់​ឡើង​វិញ​ថា​ពួកគេ​ទាំង​ពីរ​នាក់​បាន​ប្រកួត​គ្នា​ក្នុង​កម្មវិធី​ខារ៉ាបាវ​ដណ្តើម​ប្រាក់​លានកាល​ពី​ថ្ងៃ​សៅរ៍​ទី​១៦កន្លង​មក។ ក្រោយ​ពី​ឆ្លង​កាត់​ការ​ប្រកួត​ពេញ​៥​ទឹក​ចៅ​ក្រម​ពីរ​រូប​បាន​ផ្តល់​ពិន្ទុ​អោយ ឃីម បូរ៉ា​ ជាអ្នក​ទទួល​ជ័យ​ជម្នះ តែ​មាន​ចៅ​ក្រម​បី​រូប​បាន​អោយ​ ទួនប៉េ​ ជា​អ្នក​ឈ្នះ​ស្រប​ពេល​ដែល​ បូរ៉ា ជា​អ្នក​មាន​ប្រៀប​ក្នុង​ការ​ប្រកួត​នេះ​ជា​ពិសេស​បាន​វាយ​អោយ​ ទួន​ប៉េ ស្ទើរ​សន្លប់​និង​ត្រូវ​លោក អជ្ញាកណ្តាល​រាប់​នៅ​ទឹក​ទី​៤​ទៀត​ផង។


    ដោយ​សារ​តែ​លទ្ធផល​មិន​ប្រក្រតី​និង​បាន​បណ្តាល​អោយ​មាន​ប្រតិកម្មពី​សំណាក់​ប្រិយ៍មិត្ត​ក៏ដូច​ជា​ស្ថានីយ៍ទូរទស្សន៍ CBS ដែល​ទទូច​ចង់​អោយ​សហព័ន្ធ​មាន​ការ​ពង្រឹង​សមត្ថភាព​ចៅ​ក្រម​របស់​ខ្លួន​ ទើប​ឯកឧត្តម តែម ម៉ឺន បាន​ធ្វើ​ការ​ឆ្លើយ​តប​យ៉ាង​ទាន់​ពេល​វេលា​និង​បាន​បង្កើត​គណកម្មការ​អោយ​សើរ​រើ​រឿង​នេះ​ឡើង​វិញ​ដោយ ឯកឧត្តម ខ្លួន​ឯង​ក៏​បាន​ចូល​រួមពិនិត្យពិច័យ​យ៉ាង​យក​ចិត្ត​ទុក​ដាក់​ផង​ដែរ។ 

    ក្រោយ​ពី​មើល​វីឌីអូប្រកួត​សាឡើងវិញ​ក្នុង​ទឹក​ទី​មួយ សមាជិកនៃ​គណកម្មការគ្រប់​រូប​បាន​អោយ​ពិន្ទុ ឃីម បូរ៉ា ឈ្នះ​ដូចៗគ្នា​។ រីឯទឹក​ទី​២​អ្នក​ទាំង​អស់​គ្នា​ក៏​អោយ ឃីម បូរ៉ា ជា​ឈ្នះ​ទាំង​អស់​គ្នា​ដែរ។ នៅ​ទឹក​ទី​៣ លោក មាស សុខគ្រី លោក ឆឹង យ៉ៅយ៉េន លោក អ៊ិន ខេមរិន្ទ និង រ័ត្ន សត្ថា អោយ​កីឡាករ​ថៃ​ ទួនប៉េ ឈ្នះ ខណៈដែល​ឯកឧត្តម តែម ម៉ឺន និង លោក និន វណ្ណដា នៅ​តែ​អោយ ឃីម បូរ៉ា ឈ្នះ​ដដែល។ ដូចនេះ​ក្នុង​ទឹក​ទី​៣​នេះ​គណកម្មការ​សម្រេច​អោយ ទួន ប៉េ ឈ្នះ។ នៅទឹក​ទី៤ សមាជិក​ទាំង​អស់​របស់​គណកម្មការ​បាន​អោយ ឃីម បូរ៉ា ជា​អ្នក​ឈ្នះ​ទាំង​អស់​គ្នាដែរ។ ទឹក​ទី​៥​ដែល​ជា​ទឹក​ផ្តាច់​ព្រ័ត្រ សមាជិក​ទាំង​អស់​របស់​គណកម្មការ​បាន​អោយ ទួនប៉េ ជា​អ្នក​ឈ្នះ​វិញ។

    សរុប​ទាំង​៥​ទឹក​ គណកម្មការ​ខាង​លើ​បាន​បូក​សរុប​ចេញ​ជា​លទ្ធផលគឺ​ ឃីម បូរ៉ា ជា​អ្នក​ឈ្នះ ទួនប៉េ ដោយ​ពិន្ទុ​ដោយឯកច្ឆ័ន ដែល​ផ្ទុយ​ពី​លទ្ធ​ផល​ដែល​គេ​បាន​ប្រកាស​នៅ​ក្នុង​កម្មវិធី​ប្រកួត​ជាក់​ស្តែង​។


    ដូច​នេះ​តាម​រយៈ ក្រុមប្រឹក្សាបច្ចេកទេស និងក្រុមប្រឹក្សាវិន័យ បាន​សម្រេច​ថា​ចៅ​ក្រម​ទាំង​បី​រូប​ដែល​មាន​លោក ឡុង សាលវ័ន្ត លោក រាម កុសល និង លោក ម៉ង់ ស៊ីថន ដែល​បាន​ផ្តល់​ពិន្ទុអោយ ឃីម បូរ៉ា ចាញ់​គឺ​ត្រូវ​តែ​ទទួល​ពិន័យ​ដែល​បាន​ចែង​ដោយ​សហព័ន្ធ​កីឡាប្រដាល់គុនខ្មែរ​ដែល​អសមត្ថភាព​នៅ​ក្នុង​ការ​ផ្តល់​ភាព​សុក្រិត្រ​យុត្តិធម៌​ដល់​កីឡាករ​បាន ដែល​លោក​ទាំង​បី​រូប​នេះ​អាច​និង​ត្រូវ​ព្យួរការងារ​ចាប់​ពី ​៦​សប្តាហ៍​ឬ​លើស​ពី​នេះ​ ដើម្បី​បន្ត​ការ​រៀនសូត្រ​កែលម្អនូវចំនុច​ខ្វះ​ខាត​របស់​ខ្លួន។


លោក រាម កុសល (ឆ្វេង), លោក ឡុង សាលវ័ន្ត (កណ្ដាល), លោក ម៉ង់ ស៊ីថង (ស្ដាំ)

    ឯកឧត្តម តែម ម៉ឺន បាន​មាន​ប្រសាសន៍​ថា​ការ​ធ្វើ​ការ​ដោយ​ខ្ជីខ្ជារបស់​អស់​លោក​មួយ​ចំនួន​តូច​បាន​ធ្វើ​អោយ​មហាជន​មិន​ពេញ​ចិត្ត​ចំពោះ​សហព័ន្ធ​ទាំង​មូល​និង​បាន​ធ្វើ​អោយ​ខូច​មុខ​មាត់​ស្ថានីយ៍ទូរទស្សន៍​ដែល​ជា​ទី​ផ្សារ​ផ្តល់​កម្រៃ​ពលកម្ម​កីឡាករ​ទៀត​ផង។ ដូច​នេះ​លោកត្រូវ​តែ​កែលម្អ​រាល់​ភាព​អសកម្ម​ទាំង​នេះ ហើយ​ជា​មួយ​គ្នា​នេះ​ដែរ​លោក​ក៏​នៅ​តែ​ថ្លែង​អំណរគុណ​យ៉ាង​ជ្រាល​ជ្រៅ​ដល់​ប្រិយ៍​មិត្ត​គ្រប់រូប​ដែល​តែងតែ​មាន​ការ​យោគយល់​និង​រិះគន់​ស្ថាបនា​វិស័យ​និងគាំទ្រកីឡាគុនខ្មែរ​របស់​យើង​។

ទស្សសនាវីដេអូនៃការប្រកួតរវាង ឃីម បូរ៉ា និងទួនប៉េ ខាងក្រោមនេះ៖



អត្ថបទដោយ៖ ពូចយ